Ég heiti Þórunn Óskarsdóttir og hef starfað sem tölvu- og upplýsingatæknikennari í tæpa þrjá áratugi. Á þessum tíma hef ég komið víða við samhliða fastri kennslu við Fjölbrautaskólann við Ármúla - vann m.a. í fjögur ár sem verkefnisstjóri hjá Kennslumiðstöð Háskóla Íslands.

Á meðan ég starfaði þar varð ég þess áþreifanlega vör að kennarar og starfsmenn háskólans kunnu afar vel að meta það að geta fengið tæknilega aðstoð á sínum heimaslóðum, annað hvort á skrifstofunni sinni eða heima hjá sér. Í kjölfarið fylgdi svo ráðgjöf símleiðis og/eða í tölvupósti ef með þurfti og hef ég hugsað mér að hafa sama háttinn á nú.

Ofangreind reynsla er fyrst og fremst kveikjan að því að mér datt í hug að bjóða upp á þessa nýbreytni þar sem ég hef nú látið af störfum sem fastráðinn kennari. Sinni þó áfram fjarkennslu og stundakennslu í tölvufræðum þegar svo ber undir mér til ánægju og yndisauka enda finnst mér alltaf jafn skemmtilegt og gefandi að kenna.