Í þessari greinargerð hef ég leitast við að gera í stuttu máli grein fyrir lausnaleitarnámi og því upplýsingasetri sem ég hef byggt upp til að koma því á framfæri. Eins og fram hefur komið tel ég að hér sé um áhugaverða kennsluaðferð að ræða sem kennarar og skólayfirvöld hér á landi ættu að gefa nánari gaum en raunin hefur verið til þessa. Meðal annars hefur verið bent á að lausnaleitarnám fellur afar vel að mörgum áherslum í nýjum námskrám fyrir grunn- og framhaldsskóla.

Til að fylgja áhugamáli mínu eftir mun ég halda áfram að viða að mér efni og setja á vefinn og jafnframt að freista þess að stuðla að framgangi og útbreiðslu lausnaleitarnáms í íslensku skólastarfi. Hef ég þegar hafist handa á þeim vettvangi með því að halda námskeið og fyrirlestra fyrir kennara og fagfélög þeirra um lausnaleitarnám. Það sem hæst ber nú á þeim vettvangi er að vinna að því að koma á lausnaleitarnámi í sem flestum greinum í Fjölbrautaskólanum við Ármúla en þar var stofnaður samstarfshópur kennara um lausnaleitarnám vorið 2003 með stuðningi skólameistara eins og áður hefur komið fram og mun ég verða í hlutastarfi við að aðstoða hópinn. 

Framundan er að uppfæra upplýsingasetrið á þann veg að það byggi á gagnagrunni sem gerir alla leit á honum auðveldari. Er ég þá meðal annars með þau framtíðaráform í huga að safna saman 'vandamálum', þýða þau og staðfæra og setja inn á vefinn og flokka  eftir skólastigum til að auðvelda kennurum að finna 'vandamál' við sitt hæfi. Ennfremur stendur fyrir dyrum að þýða upplýsingasetrið yfir á ensku en komið hefur í ljós að heimsóknir á vefinn utan úr heimi eru ótrúlega margar. Hversu hratt þetta gengur helgast af ýmsu, m.a. því hvort opinberir aðilar sjái sér fært að styðja frekar við bakið á mér í þessu máli. Þá kemur til greina að leita ráðgjafar grafískra vefhönnuða við að þróa enn frekar viðmót upplýsingasetursins þannig að það geti orðið vettvangur fyrir þróun lausnaleitarnáms þar sem kennarar gætu veitt hver öðrum stuðning með því að ræða saman, miðla upplýsingum, skiptast á skoðunum og rökræða það sem upp kemur hverju sinni.

Auk alls þessa hef ég hug á að halda áfram að vinna að rannsókn meðal þeirra kennara sem tekið hafa upp lausnaleitarnám og nemenda þeirra sem meðal annars hefur þann tilgang að kanna viðhorf beggja til lausnaleitarnáms. Leitast verður við að athuga hvernig nemendur í lausnaleitarnámi standa sig miðað við nemendur í hefðbundnu námi. Í framhaldi af því væri forvitnilegt að fylgja nemendum eftir út á vinnumarkaðinn og kanna hvort og þá hvernig lausnaleitarnám hefur gagnast þeim sem veganesti.

Menntamálaráðuneytið hefur þegar sýnt þessari viðleitni umtalsverðan áhuga í verki eins og fram kom í Inngangi. Ennfremur má geta þess að í tilefni opnunar nýrrar Menntagáttar á ráðstefnu menntamálaráðuneytisins um upplýsingatækni í skólastarfi UT2003 völdu forráðamenn hennar upplýsingasetrið í efsta sæti á Topp 10 lista vefsetursins. Hagþenkir - félag höfunda fræðirita og kennslugagna veitti jafnframt styrk til verksins við úthlutun starfsstyrkja til ritstarfa 2003. Fyrir allt þetta ber að þakka.

Skrifað í námsleyfi mínu skólaárið 2002-2003 heima í Fossvogi
og hjá börnunum mínum í Torrevieja og Sunnyvale.

Þórunn Óskarsdóttir